香港文匯報訊（記者 蕭景源）今日（31日）網上流傳一條影片，顯示於昨日（30日）下午約2時34分，一輛七人車及一輛SUV運動型多用途車，分別沿西沙路右二線及右一線往烏溪沙方向行駛，當至恆輝街迴旋處時，位於後方的SUV駛入支路，然而卻沒有扭軚轉彎，反而直衝向路中心石壆，先撞倒黃色道路標記，再剷上石壆整車凌空飛起，落地下時左車身猛撞向七人車的右車身，將七人車撞開，七人車無辜被撞後，司機隨即剎停車輛，而SUV則繼續衝前一段距離始停在路邊。

據悉，所幸事件中SUV的58歲男司機及七人車的50歲男司機均無受傷，警方正調查意外原因。但有關片段已在網上引起網民熱議，紛紛留言：「孖寶賽車？」、「成功超車」、「拍緊霹靂火續集！」、「拍戲未必做到依個咁好效果」、「一TAKE過攪掂，唔使NG」、「成功跨欄」、「睇得出你好趕時間」、「嘩！錢家班都認輸」、「好有警察故事feel」、「令我想起以前有套港版漫畫《首都高速》其中一度過車方法」。

亦有網民狠批SUV司機的駕駛態度：「冇明顯扭軚動作，一路行直線，似係發緊夢/玩緊電話」、「馬路炸彈」、「真唔明啲人，寧願炒車都唔行錯路」、「呢啲大哥害死人，如果在鬧市衝上行人路，又唔知撞死幾多人，應該罰一世停牌」。